بِچٌاریں دل

 دل  تئی  مِھر   پَداں    دوستی ءَ  سک دلواریں

 بیا منی   ساہ ءِ   بدل   بے  تو  منی زِند زاریں

 مَرگ  راہ   چاریں  بلے  اَنگت  تئی  اُمیت واریں

 روچ رژن ءَ کہ  منی  سیاھیں   شَپ ءَ چہ تاریں

 ماہ گُشے زاناں منی سیاھیں شَپ ءَ گوں زاریں

 بید  ترا  گُل  تو  بُگوش   کئے  کہ منی گَمواریں

 شر  زانے   کہ    دگہ   کئے  کہ  منی  رازداریں

 اَرس  گوارں   تئی   راہ   آنی  سراں  راہ چاریں

 بَشی   جمبر   اِے   دویں چّم  منی  بیا ھاریں

 تئی   ھَیالانی   تہ آں  روچ   ءُ  شپاں ما گاریں

 چوں  پَتاتاں   من ءَ    مَلگور ءَ  تئی  سیاہ ماریں

 گرمزیں  لُنٹ  شراب ءَ   تو   بُگوش کئے ساریں

 مَست  ءُ  اَنوش   کَن  اَنت   لُنٹ  تئی آپ داریں

 تُن  شَندانی  سَرا  ھِچ  نہ پرشت   پَرچاں باریں

 بیا  تئی   لُنٹ  شراب ءَ   گوں   پُرشتیں  چاریں

 ھَنجریں  چّم  نگاہ   تئئ  سینگ ءَ   مئے اُپاریں

 اِے  منی  داگ  ایں  دل  ءُ   دیم   تئی پُلگاریں

 گرم  آہ  گوں  من ءَ   دارگ  کہ  نہ  بنت پاھاریں

 دل  تئی   بازیں     گَم ءَ   ناں  تو  بِچار  بیماریں

 من  منی   آرزو ءُ  دل    تئی  گماں   بے  واریں

 ماں   وتی  آر وزاں   گوں   تئی  گَم ءَ  مانداریں

 اِے  دل ءِ  باگ   منی  سُتکگ  ءُ ھُشک ءُ داریں

 گُل  تو    ویران     کُتگ      باگ   منی  گُلزاریں

 سوتگگیں    سینگ ءَ    مئے  درد  تئی  اَلگاریں

 بیا  بہ  کَن  رَھم  منی   ھال  سراں  آسگْواریں

 بَھت  سیاہ  تار   منی   شَپ  تئی  مُدام آتاریں

 دل  منی  ریش   اَمُل     بازیں  گماں  چہ باریں

 گُل ءِ     نازانی      سراں     بُلبُلی  ءَ   وازاریں

 اِے  چمن  سُتک  ءَ  پَمن   پُل  ءُ  گُل  ءَ اَنگاریں

 آسکی  چّم  ءَ  تو  وتی  شانک دے بے مھاریں

 چو  گُشے  ھنجرے  لگ اِت  مئے  دل ءَ کاٹاریں

 چاردھی  ماہ  توئے  ما   ھما  بے  نور اِستاریں

 تر  ءُ  تاب  ءَ  کہ   رویں  رُمب  تئی  دْزگْوھاریں

 داتگیں   داگ    تئی     زیمیں   دل  ءَ  یاتگاریں

 تْرانگ  ءَ  پیشیں  تئی  ماں  گوں  ھَیال ءَ یاریں

 زھریں  گَپ  شات   تئی   لَامیں  ھَبر گُپتاریں

 بیا  وتی  رازاں  بدے   ما  کہ  تئی  گوشداریں

 ساھِگ  ءَ  مِھر  وتی   بِل   کہ  تئی  دردواریں

 بد  وپا  ئے    تو   سَتر   اَنگت    تئی وپاداریں

 دل  مجن  جوش  دگہ  دلبرے  دل سِنگساریں

 اَنگت  ءَ   دل  منی  لوٹ اِت  گُل ءَ  سینگاریں

 بُلبُل ءِ  ما   تئی   مِھر  باگ ءِ  گُل ءَ چّمداریں

 گُل تئی  ناز  ءُ  تَب   ءَ  ما  کہ  مُدام رَھداریں

 چاریں  گال ءَ  ماں  وتی  بیا تئی سرءَ کتاریں

 نئیاں  من  شائرے بَس  وسپ ءَ تئی ندکاریں

 ھَر  وٹاں  کُت  ماں   بیان   شئر  پَتَو گالواریں

 دیم  تِر ءَ  رند   نہ  روت  شائری گال ءَ داریں